Þrír dagar - Steini Eiðs í viðtali: Hlakkar mikið til

Nú þegar einungis þrír dagar eru í opnunarleik sumarsins gegn Fjarðabyggð er tilvalið að fá að heyra í hvað aðstoðarþjálfarinn - Steingrímur Örn Eiðsson, hefur að segja um sumarið.

Steingrímur eða einfaldlega Steini Eiðs er að þjálfa meistaraflokk í fyrsta skipti en í fyrrasumar var hann að þjálfa þriðja flokk ásamt Pétri Ólafssyni en undir þeirra stjórn urðu þeir Íslandsmeistarar. ,,Mér líkar það bara mjög vel og það er krefjandi og skemmtilegt. Ég hlakka mikið til að byrja sumarið."

Steini vinnur náið með Dínó að þjálfuninni en Steini þarf að taka meiri ábyrgð núna og stjórna öllu frá hlíðarlínunni þar sem Dínó ætlar sér að spila í sumar. En hvernig hefur samvinnan gengið? ,,Það hefur gengið mjög vel, við höfum líka þekkst mjög lengi og erum mjög góðir vinir."

,,Mér líst mjög vel á hópinn, fín blanda af reyndum mönnum sem og ungum sprækum strákum,"sagði Steini um leikmannahópinn sem þeir félagar hafa úr að spila en nokkrar breytingar hafa orðið eins og gengur og gerist á milli ára. Má þar nefna nýja menn á borð við Dínó, Arnar Má og Guðmund Óla sem koma í stað Sigurðs Skúla, Linta og Ibra t.d.

Strákarnir fóru í æfingaferð erlendis  en einnig hefur verið stíft æfingaprógram í gangi í vetur og vor. ,,Já, ég er nokkuð ánægður bara. Fórum í góða ferð til Portúgals sem tókst alveg svakalega vel, æft stíft og haft mjög gaman. Held að hún hafi þjappað okkur mjög vel saman og skilað miklu."

Steini vildi lítið gefa út um markmið liðsins fyrir sumarið en sagði það væri bara að ná í þrjú stig í öllum leikjum. ,,Við förum bara í alla leiki til að ná í stigin þrjú, svo sjáum við bara til hverju það skilar okkur."

,,Ég er nú ekki mikill spámaður en ef við höldum haus og góðri stemningu hjá okkur þá er aldrei að vita hvað gerist."

 Eins og flestir vita var tímabilið í fyrra í heild sinni hrikalega dapurt og náði liðið rétt svo að bjarga sér frá falli í lokin en þar sem einungis eitt lið féll sluppu KA-menn sem enduðu í næstneðsta sæti. ,,Mér fannst sumarið í fyrra mikil vonbrigði, liðið var í slöku formi og náði þar af leiðandi ekki að spila einhvern bolta, fannst líka vanta alvöru metnað, að menn væru tilbúnir að deyja fyrir klúbbinn."

Það hafa margir ungir strákar verið að spila stórt hlutverk með liðinu á undirbúningstímabilinu og býst Steini við því að þeir gæti komið mörgum á óvart haldi þeir áfram á sömu braut. ,,Já það eru nokkrir ungir strákar sem ég vona að haldi áfram að bæta sig eins og þeir hafa verið að gera í vetur, þá held ég að þeir gætu komið mörgum á óvart."

Opnunarleikur sumarsins er gegn Fjarðabyggð á mánudaginn og fer hann fram í Boganum þar sem enginn grasvöllur er tilbúinn. ,,Við förum auðvitað í hann til að sækja þrjú stig enda á heimavelli.En oft er mikil spenna í fyrsta leik þegar deildin er að byrja og undirbúningstímabilið búið en ég hef trú á að strákarnir hristi mestu spennuna úr sér í vikunni og komi hæfilega spenntir í leikinn og taki vel á því."

,,Að lokum vil ég svo hvetja alla til að mæta á völlinn í sumar og hvetja strákana og hjálpa okkur að búa til góða stemningu í kringum liðið okkar KA-manna. Gerum þetta að skemmtilegu sumri, áfram KA!!!!," sagði Steini Eiðs að lokum.