Fréttir

KA lagði lið Stjörnunnar nokkuð örugglega um helgina.  Hilmar Sigurjónsson fyrrum KA maður mætti á gamla heimavöllinn en gat lítið gert við sigri KA í leiknum.  Heimamenn unnu leikinn örugglega 3-0.  

Um helgina fór fram Bikarmót BLÍ í 2. og 3. flokki. Mótið fór fram í Fylkishöllinni í Reykjavík. KA átti lið í 3. flokki karla og kvenna. Það er skemmst frá því að segja að liðin stóðu sig geysilega vel. Stelpurnar urðu bikarmeistarar með fullt hús stiga og einungis eina tapaða hrinu á móti Stjörnunni í miklum baráttuleik. Í þeim leik unnu þær fyrstu hrinuna 25 – 23, töpuðu næstu 22 – 25 og unnu svo þriðju og síðustu hrinuna 16 – 14. Það var því mikil spenna allt til loka leiksins. Aðra leiki sigruðu þær nokkuð örugglega. Þetta eru frábærar stelpur sem eiga framtíðina fyrir sér í íþróttinni!   Strákarnir urðu í 2. sæti á mótinu. Þeir áttu í basli með Stjörnuna í fyrsta leiknum og töpuðu honum. Eftir það rifu þeir sig svo upp og unnu alla leikina sem eftir voru. Þessir strákar eru mjög ungir – flestir á yngsta ári í 3. flokki og sumir hverjir í 4. flokki – þannig að það er ljóst að þarna eru gríðarlega efnilegir strákar á ferðinni. Þess má geta að þeir eru efstir eftir fyrri hluta íslandsmótsins og ljóst að þeir gefa það sæti ekki eftir baráttulaust! Það verður því spennandi að fylgjast með síðari hlutanum í vor.    

KA gerði góða ferð í höfuðborgina um helgina.  KA lagði Þróttara í gær og tók svo lið Stjörnunnar í kennslustund í dag.  Stjarnan átti aldrei möguleika í leiknum og munaði mestu um að sterkustu leikmenn liðsins náðu sér engan veginn á strik.

KA lagði lið Þróttara í vægast sagt slökum leik á föstudaginn.  Leikmenn KA, utan Jóhanns Eiríkssonar, náðu sér engan veginn á strik og verða að girða sig í brók fyrir leikinn á morgun.

Meistaflokkur karla í blaki átti góðan leik í dag gegn Fylki og vann nokkuð auðveldan 3-0 sigur.  Okkar menn unnu fyrstu hrinuna 25-17, þá næstu 25-21 og þriðju hrinuna 25-22. Marek Bernat, þjálfari liðsins gat leyft sér að nota yngri leikmenn liðsins mikið í leiknum sem kom þó ekki niðri á árangri liðsins. Piotr Kempisty var stigahæstur í liði KA með 19 stig og Davíð Búi Halldórsson var með 14 stig. Í liði Fylkis var Ivo Simeonov með 11 stig og nafni hans Bartkevics með 10 stig. Við höldum því liðið heldur því toppsætinu áfram með 16 stig og HK komst upp fyrir Stjörnuna í 2. sætið með 15 stig.

Stórt blakmót er haldið í KA heimilinu þessa helgina. Gert er ráð fyrir því að um 250 þátttakendur séu á svæðinu, allstaðar að á landinu. Hér fylgir með mynd sem sýnir umfang mótsins en hún var tekin fyrr í dag.

Blakdeild KA býður 4. og 5. flokki á Íslandsmót BLÍ í blaki. Spiluð verða 3-5. stig í báðum flokkum. Nánari upplýsingar á: krakkablak.bli.is

KA tók á móti góðvinum sínum í HK í dag og voru það hinir spræku Kópavogspiltar sem höfðu sigur. Liðin spiluðu til úrslita í fyrra og þau buðu áhorfendum upp á hörkuleik.

Tveir leikir fóru fram í KA-heimilinu í dag þegar karla- og kvennalið Þróttar Reykjavík komu í heimsókn. Karlaliðin hófu leik og þar vann Þróttur nokkuð óvænt 3-0. Stelpurnar náðu svo að hefna með því að vinna sinn leik 3-2. 

Hér er mynd af stelpunum í 3. fl. við verðlaunaafhendinguna á sunnudaginn var.  Til hamingju stelpur. Þjálfari liðsins er Piotr Kempisty - núverandi Íþróttamaður KA.