4. flokkur kvenna með góðan sigur á Fylki í dag

4. flokkur kvenna lék sinn annan leik á tímabilinu klukkan 09:00 á  sunnudagsmorgunn. Um síðustu helgi steinlá liðið heima fyrir Víking í  afskaplega döprum leik. Í þeim leik voru stelpurnar engan veginn  tilbúnar í kollinum til að spila handbolta og var sett sú krafa á þær  fyrir þennan leik að mæta klárar.

Leikurinn byrjaði heldur rólega í markaskorun en stelpurnar spiluðu  fanta vel i vörninni og Lína Aðalbjargardóttir átti stórleik fyrir  aftan góða vörn heimastúlkna. Eftir 15 mínútna leik var staðan 2-2 og  í hálfleik var staðan 5-5. Fylkisstelpur höfðu brugðið á það ráð að taka Laufeyju Höskuldsdóttir úr umferð og við það riðlaðist  sóknarleikur heimastúlkna mikið. Stelpurnar urðu ragar við að sækja á  og virtist herbragð Fylkis ætla að ganga upp. Sóknarleikurinn small þó  aftur í gang þegar línumaðurinn sterki Kolbrá Ingólfsdóttir lék fyrir  utan. Bæði lið höfðu þó hægt um sig sóknarlega en vörnin hjá KA/Þór  bætti upp fyrir öll mistök í sókninni.

Þegar líða fór á leikinn fóru mörkin þó að koma hægt og bítandi og  smám saman sigldu heimastúlkur fram úr. Þegar 10 mínútur voru búnar af  seinni hálfleik var staðan 9-6 fyrir KA/Þór og tók Fylkis þjálfarinn  þá leikhlé. Það virkaði ágætlega því að á nokkrum mínútum minnkuðu  gestirnir muninn og staðan orðin 9-8 KA/Þór í vil. Á þessum kafla  ætluðu allar sér að vera með í gleðinni og hættu að spila upp á hvor  aðra. Leikurinn breyttist í hálfgerða skotkeppni hjá KA/Þórs stúlkum  og hleyptu þær Fylki inn í leikinn. Stelpurnar spýttu þó vel í lófana  síðustu mínúturnar og unnu verðskuldaðan sigur, 15-11.

Það sást um leið og stelpurnar mættu í hús klukkan 08:00 í morgun að  þær voru klárar. Einbeitingin skein úr augunum á þeim og  endurspeglaðist það í upphitun og frá fyrstu mínútu. Sóknin gekk  vissulega brösulega lengst af í leiknum. Mikið um mistök og illa farið  með góð færi. Hins vegar bættu þær upp fyrir öll mistök í sókninni með  fanta góðri vörn með Línu gríðarlega heita fyrir aftan múrinn. Þórey  Lísa Þórisdóttir spilaði vörnina eins og herforingi þrátt fyrir að  vera búin að liggja rúmföst síðustu þrjár vikur vegna veikinda og  sýnir það að miklu leiti þann karakter sem stelpurnar sýndu í þessum  leik. Það er erfitt að rífa sig upp eftir slæmt tap en stelpurnar  gerðu það svo sannarlega. Allar voru gríðarlega virkar, létu vel í sér  heyra og börðu vel frá sér.

Stelpurnar voru bara að spila sinn annan leik í vetur í dag og því  alveg vitað fyrirfram að sóknin myndi ekki vera eins smurð og hún á  eftir að vera. Einbeitingin, baráttuviljinn og sigurhungrið skilaði  þeim þessum tveimur stigum í dag. Það er mjög mikið af hæfileikaríkum  stelpum í þessum hóp og verður mjög spennandi að fylgjast með þeim í  framtíðinni. Ef þær halda vel á spöðunum, æfa vel og leggja sig allar  fram má búast við miklu af þessum hóp í náinni framtíð. Í dag eru þær  að spila við lið sem er svipað í styrkleika og Víkingsliðið sem þær  steinlágu fyrir um síðustu helgi, munurinn var hins vegar sá að þær  mættu gríðarlega einbeittar til leiks og lögðu sig allar, hver eins og  einasta, hundrað prósent fram og uppskáru eftir því.

Um næstu helgi á liðið tvo erfiða leiki fyrir höndum í Reykjavík gegn  Val og Aftureldingu og alveg ljóst að stelpurnar þurfa að mæta með  sama hugarfari í þá leiki og þær sýndu i dag.

Markaskorar KA/Þór: Laufey Höskuldsdóttir 5 mörk, Klara Ólafsdóttir 3  mörk, Jóna Birkisdóttir, Kolbrá Ingólfsdóttir og Arna Einarsdóttir 2  mörk hver og Kara Guðný Knútsen 1 mark.

Í markinu varði Lína Aðalbjargardóttir 15 skot þar af eitt víti.