5. flokkur KA/Þórs átti frábæra helgi

KA/Þór 2 vann alla leikina um helgina

5. flokkur KA/Þórs stóð í ströngu á öðru handboltamóti vetrarins um helgina en KA/Þór er með tvö lið í aldursflokknum. KA/Þór 1 vann 2. deildina á síðasta móti og lék því í efstu deild og komu stelpurnar heldur betur af krafti inn í deildina.

Stelpurnar lentu nefnilega í 2. sæti efstu deildar með því að vinna þrjá leiki og tapa einungis einum. Þær lögðu Gróttu 13-10, Val 15-11 og HK 17-12 en þurftu að sætta sig við 8-15 tap fyrir sterku liði ÍBV og geta verið ansi sáttar með framgöngu sína.

KA/Þór 1 kom af krafti inn í efstu deildina

KA/Þór 2 hefur verið að bæta sig mikið í vetur en liðið lenti í 3. sæti 3. deildar á síðasta móti. Þær unnu hinsvegar alla leiki sína að þessu sinni og unnu 3. deildina því sannfærandi og leika í 2. deild á næsta móti. Stelpurnar unnu 18-11 sigur á Fylki, 12-9 á Haukum, 16-9 gegn Fjölni 2 og loks 15-14 baráttusigur á Víking.

Það eru því ansi spennandi hlutir að gerast hjá 5. flokk KA/Þórs og verður ansi gaman að fylgjast með liðunum á næsta móti.