Áramótabolti hjá kvennaliði KA/Þórs - myndir

Það var stór hópur stúlkna sem mætti upp í KA heimili þriðjudaginn 30. desember til þess að spila handbolta.

Hugmyndin kom frá fyrrum þjálfara meistaraflokks kvenna, Hlyni Jóhannessyni, að meistaraflokkur kvenna léki gegn gömlum KA/Þór kempum sem eitt sinn léku undir hans stjórn. Það skal þó tekið fram að þessar "gömlu" kempur verða seint taldar gamlar í árum en þó töluvert eldri en núverandi meistaraflokkur.

Til að byrja með leit allt út fyrir að yngra liðið ynni fremur auðveldan sigur en þá mundu þær "gömlu" hvernig þetta allt saman var gert hér í den og úr varð hörku leikur sem endaði með tveggja marka sigri eldri. Reyndar leikur grunur á að ein stúlkan sem spilaði með yngra liðinu hafi leikið tveimur skjöldum þar sem hún tilheyrði einnig "eldri" hópnum þar sem hún lék eitt sinn undir stjórn Hlyns.

Yngra liðið spilaði á köflum fínan sóknarleik en þó vildi til að greyið hóstaði. Hart var barist bæði í vörn og sókn og létu bæði lið finna fyrir sér á öllum vígstöðvum.

Liðin léku á köflum skemmtilegan bolta og var gaman að sjá þessar stelpur mættar aftur til leiks í gulu og bláu búningunum. Búningum sem fara þeim mun betur heldur en þeir rauðu og/eða hvítu sem sumar þeirra þora að láta sjá sig í nú til dags.

Að sjá stúlkur með þennan handboltalega þroska spila saman var eitthvað sem þær ungu geta lært mikið af. Þær eldri sýndu það svo sannarlega að þær hafa engu gleymt og synd að flestar þeirra séu hættar öllu boltakasti. Vonandi að einhverjar af þeim dragi fram skóna að nýju og fari að sprikla aftur.

Smellið hér til að skoða myndir frá leiknum.