Flottur árangur á 6. flokksmóti helgarinnar

Frábær árangur á 6. flokksmótinu (mynd: Hannes)

Það var nóg um að vera hjá yngri flokkunum í handboltanum um helgina en 3. og 4. flokkur kvenna fór suður auk þess sem að stórt 6. flokksmót hjá bæði strákum og stelpum fór fram hér fyrir norðan.

3. flokkur KA/Þórs leikur í efstu deild í ár og mætti Gróttu á Seltjarnarnesi á laugardaginn. Stelpurnar sýndu flottan karakter og gáfust aldrei upp gegn sterku liði heimastúlkna og vantaði herslumuninn til að ná stigi úr leiknum og 31-29 tap staðreynd. Á sunnudeginum lék liðið svo gegn Aftureldingu og eftir svakalegan baráttuleik tókst stelpunum að vinna frábæran 20-21 sigur og geta gengið stoltar frá helginni.

Í 4. flokki er KA/Þór með 2 lið og léku þau bæði um helgina. Stelpurnar í KA/Þór-1 gerðu sér lítið fyrir og unnu báða leiki sína um helgina, fyrst gegn Gróttu 19-21 þar sem þær leiddu frá upphafi og loks 19-21 sigur á Aftureldingu eftir að stelpurnar höfðu leitt 7-14 í hálfleik. KA/Þór-1 er því á toppi 2. deildarinnar með fullt hús stiga og spennandi að fylgjast með liðinu í vetur.

KA/Þór-2 leikur í 3. deildinni og mættu suður með hálfvængbrotið lið. Stelpurnar töpuðu 22-12 gegn HK á laugardeginum en gerðu mjög vel daginn eftir gegn Aftureldingu en þurftu á endanum að sætta sig við 20-16 tap en geta engu að síður verið ánægðar með spilamennskuna á sunnudeginum og klárt að liðið getur byggt ofan á þá frammistöðu.

Smelltu á myndina til að skoða allar myndir Hannesar Péturssonar frá mótinu um helgina

Á 6. flokksmótinu sem fram fór um helgina í KA-Heimilinu og Íþróttahöllinni tefldi 6. flokkur karla fram fjórum liðum og 6. flokkur kvenna var með eitt lið. Öll lið okkar stóðu sig með prýði en þetta var fyrsta alvöru mót margra keppenda okkar á Íslandsmóti. Hægt er að sjá öll úrslit mótsins með því að smella hér.

Stelpurnar í KA/Þór gerðu sér lítið fyrir og unnu sigur í sínum riðli í 3. deildinni en þær unnu alla leiki sína um helgina. Strákarnir í KA-1 unnu einnig sinn riðil í 3. deildinni en þeir unnu þrjá leiki og gerðu 1 jafntefli. KA-2 unnu sinn riðil í 4. deildinni og gerðu það með því að vinna alla sína leiki. Þá stóðu KA-3 og KA-4 sig vel í sínum riðli í 4. deildinni en liðin léku í sama riðli.