KA/Þór tapaði gegn Stjörnunni

KA/Þór lék gegn  Stjörnunni í 2. deild Íslandsmótsins í handknattleik kvenna á laugardag. Þetta var leikur tveggja efstu liðanna í deildinni og því búist við hörkuleik.   Liðin skiptust á að hafa forustuna fram í miðjan fyrri hálfleik en röð af mistökum KA/Þórs olli því að Stjarnan seig framúr og náði 7 marka forystu.  Þá tóku heimastúlkur leikhlé og tókst að laga leik sinn og minnka muninn í 2 mörk, 21-23 í hálfleik. 

Í síðari hálfleik náði Stjarnan fljótt 4-5 marka forskoti sem þær héldu til leiksloka án þess að KA/Þór næði að ógna þeim verulega og urðu lokatölur 35-40.  Eins og tölurnar bera með sér var lítið um vörn og markvörslu í leiknum.  Lið KA/Þórs lék sóknarleikinn á köflum ágætlega en gerði heldur mikið af mistökum inn á milli.  Í liði Stjörnunnar eru margar gamalreyndar handboltakonur og gekk KA/Þór ekkert að stöðva besta mann vallarins Nínu K. Björnsdóttur sem skoraði 14 mörk í leiknum.

Mörk KA/Þórs í leiknum skoruðu:  Martha Hermannsdóttir 8, Erla Tryggvadóttir og Kolbrún Einarsdóttir 6, Ásdís Sigurðardóttir og Emma Sardarsdóttir 4, Arndís Heimisdóttir, Inga Dís Sigurðardóttir, Steinþóra Heimisdóttir 2 og Kolbrá Ingólfsdóttir 1.