Meistaraflokkur kvenna kominn áfram í bikarkeppninni (myndir)

Í dag léku stelpurnar í KA/Þór gegn Gróttu frá Seltjarnarnesi í 8-liða úrslitum bikarkeppninnar. Er þar skemmst frá að segja að KA/Þór fór með eins marks sigur 22-21 eftir spennuþrungnar lokamínútur. KA/Þór stelpurnar náðu fljótlega forystunni og leiddu í hálfleik 12-11. Í seinni hálfleik byrjuðu stelpurnar af krafti og um miðjan hálfleikinn var forysta þeirra orðin fimm mörk, 19-14.

Grótta náði að koma sér inn í leikinn aftur og minnkaði muninn í 22-21 þegar einungis örfáar sekúndur voru til leiksloka. Bæði lið fengu tækifæri til að bæta við marki en hvorugu tókst það og það voru því KA/Þór stelpurnar sem fögnuðu frábærum sigri og sýndu að liðið er á góðri leið og er að gera fína hluti. Þannig að nú er ljóst að þær fá annað lið úr efstu deild til að glíma við í undanúrslitum bikarkeppninnar.

Stefán Guðnason þjálfari liðsins var að vonum í skýjunum í leikslok: „Þetta er kannski óvænt fyrir suma, en trúin flytur fjöll og ég veit hvernig lið ég er með í höndunum. Við leiddum með 2-3 mörkum megnið af leiknum, en stelpurnar voru eðlilega frekar taugaveiklaðar, enda ungar að árum, en þær stóðust áskorunina,“ sagði Stefán.
Skoða fleiri myndir Þóris Tryggvasonar frá sigurstemmingunni