Tap hjá KA/Þór gegn Fylki - Myndasyrpa

Á laugardaginn tóku stelpurnar í KA/Þór á móti Fylki í N1-deild kvenna. Þórir Tryggvason var á staðnum vopnaður myndavélinni og sendi okkur myndir frá leiknum. Auk þeirra fer hér á eftir umfjöllun blaðamanns Vikudags um leikinn.

KA/Þór tapaði illa gegn Fylki, 15:27, er liðin mættust í KA- heimilinu í dag í 3. umferð N1- deildar kvenna í handbolta. Fylkir hafði sex marka forystu í hálfleik, 14:8, og gerði út um leikinn í upphafi seinni hálfleiks með því að skora fyrstu fimm mörkin og lagði þar með grunninn að 12 marka sigri. 

Gestirnir að sunnan höfðu frumkvæðið í leiknum frá upphafi til enda. Það tók heimastúlkur sex mínútur að komast á blað í leiknum eftir að Fylkir hafði skorað fyrstu þrjú mörkin. Gestirnir fóru fljótlega að síga framúr í leiknum og höfðu yfir þegar flautað var til hálfleiks, 14:8.

Fylkir lagði grunninn að öruggum sigri sínum í upphafi síðar hálfleiks þegar þær skoruðu fyrstu fimm mörkin á hálfleiknum og náðu 11 marka forystu, 19:8. Það reyndist full mikill munur fyrir heimastúlkur að vinna upp og Fylkir vann öruggan 12 marka sigur, 27:15. KA/Þór er því enn án stiga í deildinni eftir þrjá leiki.

 
Emma Sardarsdóttir og Katrín Vilhjálmsdóttir sækja að marki Fylkis í leiknum á laugardaginn

Emma Sardarsdóttir var markahæst í liðið KA/Þórs í dag með 5 mörk, Inga Dís Sigurðardóttir og Ásdís Sigurðardóttir skoruðu 3 mörk hvor, Arna Valgerður Erlingsdóttir 2 mörk og þær Martha Hermannsdóttir og Guðrún Tryggvadóttir skoruðu sitt markið hvor. Selma Sigurðardóttir stóð sig vel í marki KA/Þórs og varði 12 skot í leiknum og Lovísa Oktavía Einarsdóttir varði 2 skot.

Hjá Fylki voru markahæstar þær Sunna Jónsdóttir með 7 mörk og Sunna María Einarsdóttir með 6 mörk.

Skoða myndasyrpu Þóris Tryggvasonar frá leiknum

Lesa umfjöllunina á Vikudegi.is