KA semur við Aleksandar Trninic
KA hefur komist að samkomulagi við serbneska leikmanninn Aleksandar Trninic um að hann spili með KA í 1. deildinni í sumar.
Aleksandar er 29 ára gamall og lék síðast með Rad Belgrad í Serbíu. Hann á, þrátt fyrir að vera á besta fótboltaaldri, frábæran feril að baki. Hann hefur m.a. leikið með Debrecen í Ungverjalandi og Vardar í Makedóníu, en bæði þau lið hafa verið í og úr meistaradeild Evrópu á undanförnum árum.
Aleksandar leikur sem djúpur miðjumaður en getur einnig leyst af í miðverði. Hann er stór og stæðilegur leikmaður enda rúmir 190cm á hæð.
Aleksandar er kominn til landsins og kominn með leikheimild með KA. Það eru því góðar líkur á því að hann spili með KA gegn Selfoss á laugardaginn í Lengjubikarnum. Sá leikur fer fram á Akureyri og hefst kl. 15:00.