Fréttir

Þriðjudaginn 19. apríl hefst úrslitakeppnin hjá 3. flokki karla í handbolta. KA strákarnir taka á móti liði Fram í fyrsta leik keppninnar í KA heimilinu kl. 16:00  Það má búast við hörkuleik þar sem KA endaði í 3. sæti í deildinni með 30 stig en Fram var í 6. sæti með 27 stig. Við hvetjum fólk til að mæta í KA heimilið og og styðja strákana í baráttunni til að komast í úrslitaleikinn. Áfram KA

Í kvöld er komið að fyrstu viðureigninni í úrslitakeppninnar um Íslandsmeistaratitilinn. Akureyri og HK mætast í Höllinni klukkan 19:30 og nú má enginn láta sitt eftir liggja. Mætum á leikinn og tökum sem flesta með til að hjálpa strákunum í baráttunni.

3. flokkur strákar og stelpur verða með glæsilega „Áfram KA“ stuttermaboli til sölu á 2.000 kr. stk. Þeir eru í gulum lit og tveimur bláum. Bolina verður hægt að panta og greiða í KA heimilinu mánudaginn 11., þriðjudaginn 12. og miðvikudaginn 13. apríl nk. milli klukkan 17:00 og 19:00 í KA heimilinu. Allir í Áfram KA bol, stórir sem smáir!

Um helgina fór fram heil umferð á Íslandsmótinu hjá 5. flokki karla. Það voru KA og Þór sem önnuðust þessa umferð og var leikið í KA heimilinu og Íþróttahúsi Síðuskóla. Smelltu hér til að skoða allar upplýsingar, leikjaskipulag og úrslit leikja og ljósmyndir.

Á fimmtudagskvöldið lýkur N1 deildarkeppninni að þessu sinni. Í lokaumferðinni leika Akureyri og Fram en leikurinn hefst klukkan 19:30 í Íþróttahöllinni. Bæði liðin eru örugg í úrslitakeppnina en Fram á í baráttu við HK um hvort liðið hafnar í 3. sæti deildarinnar. Á sama tíma leika HK og FH í Kópavoginum þannig að úrslit beggja leikjanna hafa áhrif.

Á laugardaginn varð KA/Þór Íslandsmeisari í 2. deild kvenna en stelpurnar tryggðu sér titilinn með því að sigra Stjörnuna 34-31 í hörkuspennandi úrslitaleik sem fram fór í íþróttahúsinu í Strandgötu. Deginum áður lögðu KA/Þór stelpurnar Víkinga í undanúrslitum 29-20. Þetta er frábær árangur hjá stelpunum okkar sem urðu í 2. sæti í deildarkeppninni í 2. deild í vetur.  Til hamingju Martha þjálfari og co. Endanlega röð liðanna varð því þannig: 1. KA/Þór 2. Stjarnan 3. Víkingur 4. Fjölnir/Afturelding

Þrjár stelpur úr KA/Þór hafa verið valdar í landsliðsúrtak í U-15 ára landsliðið, það eru þær Arna Kristín Einarsdóttir, Birta Fönn Sveinsdóttir og Hulda Bryndís Tryggvadóttir. Liðið æfir í Mýrinni í Garðabæ dagana 18.-20. apríl undir stjórn Díönnu Guðjónsdóttur og Unnar Sigmarsdóttur.

Það verður heldur betur fjör í Íþróttahöllinni á fimmtudaginn þegar Akureyri Handboltafélag tekur á móti Aftureldingu úr Mosfellsbæ í næstsíðustu umferð N1 deildarinnar. Leikurinn hefst klukkan 19:30 sem er nokkru síðar en vanalega tíðkast. Ástæðan er sú að í reglum HSÍ er kveðið á um að allir leikir í tveim síðustu umferðum deildarinnar skuli fara fram samtímis. Í leikslok á fimmtudaginn verður síðan stór stund í sögu handboltans hér á Akureyri en þá verður liðinu afhentur bikarinn sem tilheyrir Deildarmeistaratitlinum. Við treystum því að hinir frábæru stuðningsmenn fjölmenni á leikinn og taki þátt í bikarafhendingunni enda eiga stuðningsmenn liðsins drjúgan þátt í titlinum.

Aðalfundur Handknattleiksdeildar KA var haldinn á dögunum og fór hann að venju vel fram.  Ársreikningar deildarinnar voru samþykktir en bæði unglingaráð og kvennaráð voru reknar réttu megin við núllið. Ný stjórn tók til starfa og er hún að nokkrum hluta skipuð sömu einstaklingum og áður.  Hér á eftir er ársskýrsla ráðanna tveggja.

Guðríður Guðjónsdóttir og Ómar Örn Jónsson, þjálfarar U19 ára landsliðs kvenna í handknattleik, hafa tilkynnt 16 manna landsliðshópinn sem heldur til Serbíu og tekur þátt í undankeppni Evrópumótsins dagana 22.-25. apríl. Meðal þessara sextán leikmanna er Kolbrún Gígja Einarsdóttir leikmaður KA/Þórs.