Fréttir

Á laugardaginn var hin hefðbundna jólaæfingunni yngstu iðkendanna í handboltanum. Líkt og við mátti búast mættu nokkrir skeggjaðir karlar með úttroðna poka á bakinu og fengu góðar viðtökur að vanda. Hannes Pétursson sendi okkur nokkrar myndir frá æfingunni sem er hægt að skoða hér.

4.fl. karla A-lið eiga leik föstudag 16. desember kl.18:30 og B-lið einnig föstudag 16.desember kl.20:00   Bæði liðin hjá 3.fl. karla eiga leiki um helgina. KA1 á laugardag 17.desember kl.13:30. KA2 á laugardag kl.15:00 og sunnudag 18. desember kl.13:00. Allir þessir leikir fara fram í KA-Heimilinu.

Nú er komið að jólaæfingunni hjá yngstu iðkendum í handboltanum en hún verður í KA heimilinu laugardaginn 17. desember  klukkan. 9:30-10:30 Æfingin er bæði fyrir stráka og stelpur í 7. - 8. flokki (1.-4. bekkur).  Leikir og þrautabraut, gestir með rauðar húfur kíkja í heimsókn, með góðgæti í poka.  Allir iðkendur hvattir til að mæta og taka foreldra og systkini með. Kveðja Unglingaráðið

Þá er komið að síðasta heimaleik Akureyrar á þessu ári og það er enginn smáleikur. Haukar, topplið N1 deildarinnar kemur í heimsókn og engum blöðum um að fletta að þetta er einn af stórleikjum deildarinnar. Undanfarin ár hafa leikir Akureyrar og Hauka dregið að sér flesta áhorfendur í deildarkeppninni hér í Íþróttahöllinni og viðbúið að sama staða verði uppi í kvöld.

Það gengur ekki lítið á í handboltanum þessa dagana, magnaður leikur gegn FH í síðustu viku og í dag, miðvikudag er komið að stærsta heimaleiknum til þessa þegar Fram liðið mætir í Íþróttahöllina. Að þessu sinni er brugðið út af vananum og leikið á miðvikudegi, það er því rétt að hnippa í kunningjana og minna þá á breytingu frá venjunni.

Yngra ár 5. flokks kvenna renndi suður á föstudagsmorgunn til að keppa á sínu öðru móti til Íslandsmeistara þennan veturinn. Líkt og síðast voru tvö lið skráð til keppni, KA/Þór1 og KA/Þór2. KA/Þór1 vann sér á síðasta móti þátttökurétt í 1. deild og því ljóst að þær voru að fara að keppa við bestu liðin í sínum árgang í þessari ferð.

KA/Þór leikur gegn FH í Eimskipsbikarnum í kvöld kl.18:00.  Leikurinn fer fram í Kaplakrika. Akureyringar á suðvesturhorninu er hvattir til að mæta og hvetja okkar lið.

KA/Þór tekur á móti Stjörnunni  laugardaginn12. nóvember í N1 deild kvenna. Leikurinn er í KA heimilinu og hefst klukkan 16:00. Liðið er búið með tvo heimaleiki, unnu FH og töpuðu síðan með einu marki fyrir Haukum þannig að það má búast við góðri skemmtun í KA heimilinu. Aðgangur er ókeypis og gómsætar vöfflur í boði í hálfleik.

3. flokkur KA mætir Stjörnunni í heimaleik á laugardaginn. Að þessu sinni spila strákarnir í Íþróttahöllinni og hefst leikurinn klukkan 14:00. Það er mikið um að vera á laugardaginn, meistaraflokkur KA/Þór spilar heimaleik í KA heimilinu gegn Stjörnunni og hefst sá leikur klukkan 16:00. Sömuleiðis á 2. flokkur Akureyrar heimaleik gegn Stjörnunni á laugardaginn en sá leikur hefst klukkan 12:30 í Íþróttahöllinni. Það má því segja að laugardagurinn verði sannkallaður stjörnudagur!

Haukar sóttu tvö stig norður í gær er liðið sigraði KA/Þór með eins marks mun í KA-heimilinu í N1-deild kvenna í handknattleik. Lokatölur urðu 28-29 en lokamínúturnar voru æsispennandi þar sem heimamenn hefðu getað jafnað metin í síðustu sókn leiksins. Sú sókn rann hins vegar út í sandinn og Haukastúlkur fögnuðu vel í leikslok.