Keppnistímabilið 1992-1993

Haldið var í æfingaferð til Hollands að þessu sinni í öndverðum september, leiknir þar 6 leikir og unnust 5.

Var æft tvisvar á dag auk nefndra leikja og voru menn almennt sáttir við æfingaförina, einkum þótti Júgóslavi að nafni Iztoc Race standa sig með prýði.

Liðið fór hægt af stað um haustið, t.d. mátti liðið sætta sig við jafntefli við Þór, sem á ný var meðal hinna bestu, 21:21 eftir að hafa haft forystu lengst af, jöfnuðu Þórsarar sekúndum fyrir leikslok, sýndu þeir mikinn móð. Svo illa gekk að liðið var í neðsta sæti 1. deildar að loknum 7 umferðum með einungis 3 stig! Vel gekk í bikarnum hins vegar uns liðið var stöðvað í ærslaleik miklum í KA-húsinu troðfullu, af Selfossi er skoraði sigurmarkið á lokasekúndum, 25:26. Sárabót fyrir Alfreð og liðið var 28:24 sigur á Þór og gerði Alfreð 11 mörk í þeim leik.

Liðið átti erfiða daga í deildinni, 8. sæti eftir 19 umferðir og náði sér aldrei almennilega á skrið þennan vetur, vissulega vonbrigði því menn vilja sjá framþróun eða hvað. Hún reyndist svo sannarlega vera til staðar þó ekki væri hana að finna í mfl. Yngri flokkastarf KA er komið á fullt skrið, drengir og stúlkur vinna flesta leiki hér nyrðra og komast í úrslit. Jóhannes Bjarnason stimplaði sig eftirminnilega inn auk annarra þjálfara okkar, s.s. Erlings Kristjánssonar, Andrésar Magnússonar, Einvarðs Jóhannssonar og Árna Stefánssonar. Niðurstaða vetrarins er óyggjandi, þrír Íslandsmeistaratitlar í 5., 4. og 3. flokki! Auk þess náði félagið góðum árangri í þeim fjórða. Jóhannes skilaði 2 titlum í hús og Árni 1. Sannarlega einstakur árangur og góðar fréttir fyrir ókomna tíð fyrir félag okkar enda þetta ungviðið sem erfa mun félagið.

Íslandsmeistarar KA í 3. flokki 1993
Íslandsmeistarar KA í 3. flokki í handbolta 1993. Aftari röð frá vinstri: Halldór Sigfússon. Óli Börn Ólafsson, Sverrir Björnsson, Tómas Jóhannesson, Heimir Haraldsson, Arnar Gunnarsson. Fremri röð frá vinstri: Óskar Bragason, Ísleifur Einarsson, Atli Þór Samúelsson, Hörður Flóki Ólafsson, Bjarni Bjarnason.

Íslandsmeistarar KA í 4. flokki 1993
Íslandsmeistarar KA í 4. flokki í handbolta 1993. Efri röð.frá vinstri: Vilhelm A. Jónsson, Kári Jónsson, Anton Ingi Þórarinsson, Axel Árnason, Arnar Gunnarsson, Guðmundur Pálsson, Smári Stefánsson. Fremri röð frá vinstri: Hlynur Erlingsson, Heimir Árnason, Hafþór Einarsson, Halldór Sigfússon, Hörður Flóki Ólafsson. Þórir Sigmundsson, Hákon Atlason.

Íslandsmeistarar KA í 5. flokki 1993
Íslandsmeistarar KA í 5. flokki í handbolta 1993. Aftari röð frá vinstri: Hans Hreinsson, Jónatan Magnússon, Ævar Guðmundsson, Atli Þórarinsson, Davíð Helgason, Hilmar Stefánsson, Jóhann Hermannsson. Fremri röð frá vinstri: Jóhann Sigurðsson, Gylfi Hans Gylfason, Arnviður Björnsson, Hólmar Örn Finnsson, Haddur Stefánsson, Egill Þorbergsson, Lárus Stefánsson.

Og svona litu liðin út í búningunum:

Íslandsmeistarar KA 1993 – 3. flokkur karla
Íslandsmeistarar KA 1993 – 3. flokkur karla. Aftari röð frá vinstri: Halldór Jóhann Sigfússon, Óli Björn Ólafsson, Sverrir Björnsson, Matthías Stefánsson, Tómas Jóhannesson, Heimir Haraldsson, Árni Stefánsson þjálfari. Fremri röð frá vinstri: Óskar Bragason, Ísleifur Einarsson, Birkir Magnússon, Atli Samúelsson, Hörður Flóki Ólafsson, Bjarni Bjarnason, Arnar Gunnarsson.

Íslandsmeistarar KA 1993 – 4. flokkur karla
Íslandsmeistarar KA 1993 – 4. flokkur karla. Aftari röð frá vinstri: Jóhannes G. Bjarnason þjálfari, Vilhelm Anton Jónsson, Kári Jónsson, Anton Þórarinsson, Guðmundur Brynjarsson, Axel Árnason, Arnar Gunnarsson, Arnar Vilhjálmsson, Guðmundur Pálsson, Gunnar Níelsson. Fremri röð frá vinstri: Hlynur Erlingsson, Heimir Örn Árnason, Hafþór Einarsson, Halldór Jóhann Sigfússon, Hörður Flóki Ólafsson, Þórir Sigmundsson, Hákon Atlason, Smári Stefánsson.

Íslandsmeistarar KA 1993 – 5. flokkur karla
Íslandsmeistarar KA 1993 – 5. flokkur karla. Aftari röð frá vinstri: Þórarinn E. Sveinsson, Davíð Helgason, Jónatan Magnússon, Atli Þórarinsson, Ævar Guðmundsson, Jóhann Hermannsson, Egill Þorbergsson, Lárus Stefánsson, Jóhannes G. Bjarnason þjálfari. Fremri röð frá vinstri: Hilmar Stefánsson, Jóhann Sigurðsson, Hómar Örn Finnsson, Hans Hreinsson, Arnviðar Björnsson, Haddur Stefánsson, Gylfi Hans Gylfason.

Orð Einars fyrrum formanns eiga vel við er hann sagði í skýrslu hversu mikilvægt væri að hlú að yngri flokka starfinu, sem er í reynd mikilvægasti hluti félagsstarfsins.

Í fullu samræmi við árangur á Íslandsmótinu gekk flokkunum vel í Akureyramótinu og unnu velflesta flokka, þ.á.m. A-, B- og C-lið sumra flokka. Meistaraflokkurinn vann mótið að vanda kann maður að segja, kokhraustur. Stefán Arnaldsson var kosinn landsins besti dómari ásamt félaga sínum, Rögnvald Erlingssyni, og er það árviss atburður.

1988-1992 << Framhald >> 1993-1994

Knattspyrnufélag Akureyrar  |  Dalsbraut 1 600 Akureyri  |  S. 462 3482  |  handbolti@ka.is