Keppnistímabilið 2021-2022

Þjálfari meistaraflokks karla var Jónatan Magnússon og honum til aðstoðar Sverre Andreas Jakobsson og Heimir Örn Árnason. Liðið lék í Olís deild karla og endaði í 6. sæti deildarinnar og komst þar með í úrslitakeppnina þar sem liðið féll út á móti Haukum með eins marks tapi í oddaleik. Í bikarkeppninni fór liðið í úrslitaleikinn sem tapaðist eftir hörkurimmu á móti Val.

Líkt og undanfarin ár léku konurnar undir merki KA/Þór og gerðu góða hluti á tímabilinu. Þjálfari meistaraflokks KA/Þór var Andri Snær Stefánsson og honum til aðstoðar Sigþór Árni Heimisson. Stelpurnar hófu keppnistímabilið með því að vinna bikarkeppnina 2021 og gerðu flotta hluti í sínu fyrsta Evrópuverkefni, unnu sigur á Kósóvómeisturum Istog en féllu út á markamun gegn spænsku bikarmeisturunum Elche á Spáni.
Í Olís deild kvenna hafnaði liðið í þriðja sæti en féll út úr fjögurra liða úrslitum eftir fjögurra leikja einvígi gegn Val. Í bikarkeppninni komst liðið sömuleiðis í fjögurra liða úrslitin en tapaði þar gegn Fram.

Að venju áttum við leikmenn sem sköruðu fram úr á landsvísu. Óðinn Þór Ríkharðsson og Rut Arnfjörð Jónsdóttir voru valin bestu leikmenn Íslandsmótsins og er þetta annað árið í röð sem að KA og KA/Þór eiga besta leikmann tímabilsins. Rut var jafnframt valin mikilvægasti leikmaður Olís deildar kvenna og Óðinn besti sóknarmaður Olís deildar karla. Sjá nánar hér.

Á lokahófi Handknattleiksdeildar KA var tímabilið gert upp og veittar fjölmargar viðurkenningar sem lesa má um með því að smella á myndina.

Yngri flokkar félagsins stóðu heldur betur fyrir sínu. Fjórði flokkur karla hélt áfram sigurgöngu sinni og vann allt sem hægt var að vinna og kórónaði frammistöðuna með því að vinna sigur á Partille Cup í Svíþjóð.

4. flokkur KA/Þór vann sömuleiðis bikarmeistaratitilinn en lið félagsins voru heldur betur í eldlínunni á úrslitadeginum sem má lesa um með því að smella á myndina.