Fréttir

Helgina 26.-28. ágúst verður haldið C-stigs dómaranámskeið, en það er efsta stig dómararéttinda. Skráning fer fram á robert@hsi.is og lýkur föstudaginn 19. ágúst nk. Þátttakendur skulu taka fram við skráningu nafn, kennitölu, félag, tölvupóstfang og síma. Áhugasamir KA menn sem vilja dæma í vetur geta fengið námskeiðið og ferðir greiddar af félaginu.  Hafið sambandi við Erling í síma 690-1078.

Æfingamót í meistaraflokki kvenna í handknattleik verður á Akureyri 9. -10. september.  Leikið verður í KA heimilinu.  Leiktíminn 2x30 mín. Þau lið sem hafa áhuga á þátttöku er beðin að tilkynna það til Jóhannesar Bjarnasonar sími: 662-3200.

Vikuna 20.- 24. júní var starfræktur Handboltaskóli Greifans. Kennslan fór fram í Íþróttahúsi KA við Lundarskóla en kennarar voru þeir Jóhannes G. Bjarnason og Sævar Árnson sem samanlagt hafa þjálfað handbolta í rúma hálfa öld. Á níunda tug nemenda á aldrinum 11-18 ára skráðu sig í skólann og var hópnum skipt eftir aldri. Þátttakendur sóttu fyrirlestra um hina ýmsu þætti handboltans og síðan tóku við fjölbreyttar æfingar í sal.

Nú er það frágengið að landsliðsmennirnir Arnór Atlason, Guðjón Valur Sigurðsson og Ásgeir Örn Hallgrímsson munu heimsækja handboltaskóla Greifans sem haldinn verður í næstu viku. Þá eru einnig góðar líkur á að Björgvin Páll Gústafsson komi. Strákarnir okkar ætla að miðla af reynslu sinni og segja krökkunum til á æfingunum. Skólinn er fyrir alla krakka eldri en 11 ára (fædd 2000).

Þjálfara Akureyri Handboltafélags vantar 3ja herb. íbúð til leigu með húsgögnum frá og með 15. júní. Nánari upplýsingar gefur Atli Hilmarsson sími 897 7627.

Handboltaskóli Greifans er fyrir alla stráka og stelpur frá 11 ára aldri og fer fram í Íþróttahúsi KA við Lundarskóla. Skólinn er 5 x 2 klukkutímar og kostar kr. 5.000. Í skólanum verður blanda fyrirlestra og æfinga í sal. Í fyrirlestrunum verður fjallað um: · Markmiðssetningu og sjálfstraust · Mataræði og hvíld · Sóknarleik · Varnarleik

Fimmtudaginn 19. maí var  haldið árlegt lokahóf yngri flokka handboltans í KA heimilinu.  Að vanda var mikið fjör, farið í leiki, keppt við foreldra í reiptogi, eggjakasti, handbolta o.fl. Veittar voru viðurkenningar og í lokin klassísk pizzuveisla.

Fimmtudaginn 19/5 kl. 18:00 verður lokahóf yngri flokka handboltans haldið í KA heimilinu.  Veittar verða viðurkenningar, farið í leiki og endað á pizzuveislu.  Allir iðkendur eru hvattir til að mæta og foreldrar og systkini velkomin með. Æfingar hjá yngstu krökkunum hætta eftir lokahóf en eldri flokkar halda áfram í samráði við þjálfara. Sjáumst hress í KA heimilinu! Unglingaráð handknattleiksdeildar KA

Nú er ljóst að ekkert nema sigur kemur til greina í leik Akureyrar og FH á sunnudaginn. Það er einfaldlega ekki í boði að láta FH-inga lyfta bikarnum hér á okkar heimavelli. Við þurfum ekki að hafa mörg orð um mikilvægi þess að troðfylla Höllina og berjast til síðasta manns. Leikirnir tveir sem búnir eru hafa verið algjörlega stál í stál og í raun hefði hvort liðið sem var getað gengið af velli sem sigurvegari. Við höfum áður bent á stöðuna sem var uppi í einvígi KA og Vals frá 2002 og nú er hreinlega ekkert annað í stöðunni en að endurtaka leikinn frá vorinu 2002 en til þess þurfa allir að leggjast á eitt. Leikurinn hefst klukkan 16:00 á sunnudaginn og húsið opnað klukkan 15:00.

Úrslitaeinvígi Akureyrar og FH heldur áfram í kvöld klukkan 20:15 en að þessu sinni verður leikið í Kaplakrika, heimavelli FH. Akureyrarliðið er staðráðið í að jafna stöðuna í einvíginu og hvetjum við alla stuðningsmenn sem verða staddir í nágrenni Hafnarfjarðar til að fjölmenna á leikinn og taka virkan þátt í baráttunni. „Það er fín stemmning í hópnum hjá okkur. Við erum búnir að fara yfir leikinn á þriðjudaginn og við látum þetta tap ekkert á okkur fá. Það er fullt eftir ennþá og við ætlum að halda áfram á fullum krafti,“ segir Atli Hilmarsson þjálfari Akureyrar í viðtali við Vikudag.