Fréttir

Þann 16. maí síðastliðinn stóð unglingaráð handboltans fyrir árlegu lokahófi yngri handboltaiðkenda. Þar var að vanda glatt á hjalla eins og lög gera ráð fyrir. Þórir Tryggvason var á staðnum með myndavélina og sendi okkur dágóðan slatta af myndum sem eru komnar inn í myndasafnið. Smelltu hér til að  skoða myndirnar.

Fjórir leikmenn 4. flokks KA voru í dag valdir í úrtakshóp fyrir landslið Íslands í handbolta fyrir leikmenn fædda 1992 og síðar. Leikmennirnir eru þeir Gunnar Bjarki Ólafsson (markvörður), Ásgeir Jóhann Kristinsson (skytta), Guðmundur Hólmar Helgason (miðjumaður) og Sigþór Árni Heimisson (horna- og miðjumaður). Gunnar, Ásgeir og Guðmundur eru allir fæddir árið 1992 og Sigþór árið 1993.

Í gær, fimmtudag, var haldin sérstök æfing fyrir stóra handboltamenn á Íslandi. Mikið hefur verið rætt og ritað um það að undanförnu hve brýn nauðsyn sé á slíkum mönnum í íslenskan handbolta í framtíðinni. KA menn hafa stóra leikmenn líkt og önnur lið og vildu að sjálfsögðu senda sína leikmenn á þessa æfingu.

Fundur um stöðu handboltans á Akureyri sem boðað var til s.l. fimmtudag 15. maí af íþróttafélögunum KA og Þór tókst mjög vel. Af mætingunni á fundinn má dæma að áhuginn fyrir handboltamálum á Akureyri hefur ekki farið dvínandi, en á  bilinu60 - 70 manns mættu á fundinn.

Eins og við er að búast eru ýmsar spurningar uppi varðandi stöðu handboltamála á Akureyri þessa dagana, ekki síst með tilliti til frétta af miklum erfiðleikum varðandi fjárhagsstöðu handboltans. Boðað hefur verið til tveggja almennra funda í vikunni til að ræða þessi mál.

Um helgina fór fram Íslandsmót 6. flokks stráka sem haldið var af KA og Þór.  Hér má sjá öll úrslit og lagfærða lokastöðu mótsins.

Dagana 2.-4. maí fer fram 5. umferð í Íslandsmóti 6. flokks karla hér á Akureyri. Mótið fer fram hér á Akureyri og nefnist Hagkaupsmót KA og Þórs. Leikið er í KA-húsinu við Dalsbraut svo og í Síðuskóla við Bugðusíðu. Upplýsingar um leikjafyrirkomulag er hægt að nálgast hér.

B-lið 4. flokks lék til úrslita á Íslandsmótinu í dag gegn Fram. Í gær vann liðið sem kunnugt er frábæran sigur á Gróttu sem liðið hafði ekki náð að sigra áður í vetur. Leikurinn í dag fór ekki líkt og vonast var til og vann Fram stóran sigur á KA. KA-menn mega þó vel við una en bæði A og B lið 4. flokks fóru í úrslitaleiki Íslandsmótsins þetta tímabilið.

Þær ánægjulegu fréttir voru að berast að B lið 4. flokks karla sigraði Gróttu í undanúrslítaleik Íslandsmótsins núna rétt í þessu 20-14 eftir að hafa verið yfir 11-8 í hálfleik. Strákarnir munu því leika til úrslita á morgun um Íslandsmeistaratitilinn en andstæðingur þeirra verða Frammarar. Úrslitaleikurinn verður klukkan 14:30 í Austurbergi. Þetta er frábært hjá strákunum og gaman ef þeim tekst að bæta árangur A liðsins sem einnig lék til úrslita í sínum flokki um síðustu helgi en hafnaði þá í öðru sæti.