Fréttir

A-lið og B-1 í 4. flokki karla léku gegn FH í dag. Leikirnir eru þeir fyrstu af fjölmörgum hjá KA í mars mánuði en núna er lokaspretturinn af Íslandsmótinu opinberlega hafinn. KA fer mjög vel af stað í þeim hluta mótsins og unnu bæði lið góða sigra. A-liðið vann 32-30 sigur eftir að hafa leitt með þremur mörkum í hálfleik. B-1 kláraði sinn leik strax í fyrri hálfleik og var sjö mörkum yfir í hálfleik. Þeir unnu að lokum 29-19 sigur.

Athugið að það er aukaæfing í KA-heimilinu á sunnudaginn klukkan 9:30. Mjög áríðandi að allir mæti.

Öll þrjú lið 4. flokks karla leika um helgina í KA-Heimilinu. A og B-1 fá FH í heimsókn. B-2 leikur gegn Aftureldingu. Ljóst er að um hörkuleiki er að ræða. Núna er lokaspretturinn á tímabilinu að fara að stað og einungis tæpir tveir mánuðir eftir. Strákarnir hafa lagt mikið á sig til þessa og verið að ná góðum úrslitum. Mjög mikilvægt er að byrja lokatörnina á fullu og koma sér í góð sæti fyrir úrslitakeppnina en bæði A og B1 eiga möguleika á deildarmeistaratitlum. Hvetjum alla til að mæta á leikina. Laugardagur: 11:30: KA - FH (A-lið) 12:30: KA1 - FH (B-lið) Sunnudagur: 11:00: KA2 - Afturelding (B-lið)

Fyrirhuguð er ferð til Reykjavíkur 13.-15. mars á Íslandsmót 6. flokks. Mótið fer fram í Framhúsinu í Safamýri og gist verður á keppnisstað. Lagt verður af stað um kaffileytið föstudaginn 13. mars en heimkoma ræðst af gengi liðanna á mótinu. Unglingaráð greiðir niður ferðina og þ.a.l. verður kostnaður drengjanna 3.000 krónur. Þeir drengir sem ekki fara á mótið eru vinsamlega beðnir um að tilkynna það sem fyrst. Nánari upplýsingar koma á heimasíðu KA og með miða mánudaginn 9. mars. Þeir foreldrar sem vilja fara sem fararstjórar vinsamlega hafið samband við undirritaðan. Jóhannes G .Bjarnason s. 662-3200

Eftir mikil vonbrigði síðastliðinn sunnudag sýndi A-lið 4. flokks svo um munar hvað í þá er spunnið. Liðið mætti Þór í gær í Síðuskóla. KA vann öruggan 8 marka sigur 34-42 í 50 mínútna handboltaleik eftir að hafa leitt 17-24 í hálfleik. KA lék mjög óhefðbundin handknattleik í leiknum og komu Þórsurum algjörlega úr jafnvægi með leik sínum.  KA-menn geta þakkað sigrinum það að allir 9 leikmenn sem voru á leikskýrslu voru klárir til leiks og allir skiluðu þeir, hvort sem það var í vörn eða sókn. Liðsheildin á þennan sigur 100%.

4. flokkur kvenna vann í dag öruggan sigur á Víkingum. Það er ekki hægt að segja að leikurinn hafi verið mikið fyrir augað en stelpurnar gerðu það sem þurfti til að klára leikinn og unnu að lokum 12 marka sigur 24-12.

Rétt er að benda á að æfingar hjá 6. flokki drengja eru með óbreyttum hætti þrátt fyrir vetrarfrí í skólum. Einnig er því komið á framfæri að hafinn er undirbúningur vegna suðurferðar strákanna 13.-15. mars næstkomandi og eru þeir foreldrar sem hafa áhuga á að koma sem fararstjórar beðnir um að hafa samband við Jóhannes Bjarnason þjálfara í síma: 662 3200.

 Á morgun, miðvikudag, klukkan 20:00 fer fram stórleikur í íþróttahúsinu við Síðuskóla. Þar munu Þór og KA mætast í 4. flokki karla. Ljóst er að eins og vanalega þegar þessi lið mætast verður hart barist enda mikið í húfi fyrir drengina. KA er í 4. sæti deildarinnar með þónokkra leiki inni á liðin fyrir ofan en strákarnir eru með næst fæst töpuð stig liða í deildinni. Þórsarar eru aftur á móti neðstir. Staða liðanna í deild skiptir þó engu máli í svona leik og hvetjum við allt áhugafólk um íþróttir að mæta því þarna etja kappi framtíðarleikmenn bæjarsins. Áfram KA!

A-lið 4. flokks lék í undanúrslitum bikars í gær gegn Stjörnunni. Eftir að hafa verið yfir 9-11 í hálfleik og eftir mikinn spennuleik vann Stjarnan 22-21 og bikardraumurinn því úti hjá okkar mönnum. B-2 lið 4. flokks fór á Húsavík og var þar um annan hörkuleik að ræða. KA var yfir lengst af en í lokinn voru Völsungar sterkari og unnu 17-16.

Stelpurnar í meistara- og 3. flokk kvenna fóru suður í hálfgerða óvissuferð síðasta laugardag. Ferðin var óvissuferð að því leiti að óvíst var hvort að hægt væri að keyra heim um kvöldið sökum veðurs. Norðanstúlkur létu það þó ekki á sig fá enda aðeins í neyð sem leikjum er frestað fyrir tilstilli KA.