Fréttir

Nú hefjast handboltaæfingar að nýju. Fyrsta æfing 4. flokks stráka verður á þriðjudaginn klukkan 18:45 en þá verður útihlaup og stuttur fundur þar á eftir. Strákar mætið því í galla sem hæfir hlaupi og veðurfari. Kveðja Stefán Guðnason

Það stendur mikið til hjá þeim félögum Sævari Árnasyni, Jóhanni Gunnari Jóhannssyni og Guðmundi Hólmari Helgasyni þessa dagana en næstkomandi mánudag halda þeir í æfinga- og kynnisferð til Þýskalands. Þar verða þeir í heimsókn hjá Alfreð Gíslasyni og meistaraliði hans Kiel fram á föstudaginn 7. ágúst.

Frá hausti 2009 mun MA og VMA bjóða upp á afrekssvið sem valið er samhliða annarri braut.  Ýmsar greinar verða með í vetur og hefur Handknattleiksdeild KA hug á að vera með í þessu starfi. Ítarlegri upplýsingar um málið fylgja hér á eftir.

Hátt í 400 manns mættu á lokahóf handknattleiksdeildar sem haldið var miðvikudaginn 20. maí s.l. Veturinn hefur verið mjög góður fyrir handboltann í KA en mikil fjölgun var í iðkendafjölda, voru þeir nú um 250. Það má m.a. þakka olympíusilfri Íslendinga þessum aukna áhuga á sportinu. Einnig endurheimti KA þrjá reynslumikla þjálfara í vetur þá Jóa Bjarna, Sævar Árna og Einvarð.

Valinn hefur verið 14 manna lokahópur U-17 landsliðs Íslands í handbolta sem mun fara fyrir Íslands hönd á Ólympíuleika æskunnar í Finnlandi en leikarnir fara fram í júlí. Tveir KA-menn eru í lokahópnum og heita þeir Ásgeir Jóhann Kristinsson og Guðmundur Hólmar Helgason. Drengirnir voru á yngra ári í 3. flokki í vetur en léku þó einnig báðir með 2. flokki hjá Akureyri Handboltafélagi, Guðmundur t.d. byrjaði úrslitaleikinn gegn FH. Þá var Ásgeir í hóp hjá meistaraflokki eitt sinn í vetur. Til hamingju strákar og gangi ykkur vel!

Þrír KA-menn hafa verið valdir í landsliðshóp U-15 ára í handbolta. Sá hópur mun æfa saman í lok maí. Drengirnir frá KA eru: Daníel Matthíasson (línumaður), Finnur Heimisson (leikstjórnandi) og Kristján Már Sigurbjörnssson (hægri skytta). Allir eru þeir á yngra ári í 4. flokki. Við óskum þeim að sjálfsögðu innilega til hamingju með valið.

Lokahóf yngri flokka Handknattleiksdeildar KA fer fram í KA-heimilinu miðvikudaginn 20. maí kl. 18:00. Farið verður í ýmsa leiki og þrautir leystar undir leiðsögn Einvarðs Jóhannssonar þjálfara.

Núna á dögunum var valinn landsliðshópur U-17 í handbolta en sá hópur mun æfa um helgina. Alls voru fjórir KA-menn valdir í hópinn. Það eru þeir Ásgeir Jóhann Kristinsson (skytta), Guðmundur Hólmar Helgason (skytta og miðjumaður), Gunnar Bjarki Ólafsson (markvörður) og Sigþór Árni Heimisson (horna- og miðjumaður). Þetta er glæsilegt afrek fyrir drengina að vera valdir í þennan hóp en þessir fjórir hafa verið í hverjum einasta hóp síðan fyrst var farið að velja landsliðshópa fyrir þennan árgang. Við óskum þeim innilega til hamingju með valið en athygli vekur þó að ekki séu fleiri frá KA í þessum hóp því að auki þessum eru svo sannarlega einstaklingar sem eiga heima þarna

Ekki verða fleiri laugardagsæfingar hjá strákunum en mánudags- og fimmtudagsæfingarnar halda áfram til mánaðarmóta. Minnum á að lokahóf yngri flokka handboltans verður miðvikudaginn 20. maí en nánar verður fjallað um það hér á síðunni fljótlega.

KA/Þór lék sinn síðasta leik á tímabilinu á laugardag gegn Víkingi.  Þetta var lokaleikur í úrslitakeppni 2.deildar. Víkingar sigruðu í leiknum 26-25 eftir að staðan í hálfleik var 15-14 fyrir Víking.  Markahæstar í liði KA/Þórs voru Arna Erlingsdóttir með 8 mörk og Emma Sardarsdóttir með 6 mörk. Nú taka við þrek og kraftæfingar hjá stelpunum fram að sumarfríi í júní. Stefnan er svo sett á að æfingar hefjist um miðjan júlí og að æfa af krafti til að taka þátt í efstu deild á næsta vetri.