Fréttir

Nú er komið að því, eftir allt of langt hlé, að getraunastarfið hefjist aftur hjá okkur. Næstkomandi laugardag verður fyrsta umferðin í innanfélagskeppninni.

Loksins er komið að leikdegi í úrvalsdeild hjá meistaraflokki karla. Deildin hefur fengið nýtt nafn, heitir að þessu sinni Olís-deildin. Fyrstu mótherjar Akureyrar eru engir aðrir en Íslandsmeistarar Fram. Leikmenn ætla svo sannarlega að sýna að þeir séu tilbúnir í slaginn og vonast að sjálfsögðu til að fá fulla höll í fyrsta leik. Við minnum á hversu frábær skemmtun það er að koma á alvöru handboltaleik. Líkt og í fyrra verður opið gæsluherbergi fyrir yngstu börnin þar sem þau geta leikið sér í ýmsum boltaleikjum.

Boðað er til stutts fundar með foreldrum leikmanna 5. flokks karla karla miðvikudaginn 18. september. Fundað verður í fundarsal KA heimilisins og er áætlað að fundurinn standi frá klukkan 18:30 til klukkan 19:00. Helstu dagskrárliðir eru: Vetrarstarfið Keppnisferðir Kynning á þjálfurum flokksins Fulltrúi unglingaráðs mætir á fundinn og spjallar við foreldra. Eins og áður segir, klukkan 18:30 - 19:00 miðvikudaginn 18. september í fundarsal KA-heimilisins.

Framundan eru Norðurlandamót U17 og U19 í blaki og hafa landsliðsþjálfararnir valið í æfingahópa. Blakdeild KA á þar marga fulltrúa eins og oft áður. Í æfingahópi U17 karla eru Benedikt Rúnar Valtýsson, Gunnar Pálmi Hannesson, Sigurjón Karl Viðarsson, Sævar Karl Randversson, Valþór Ingi Karlsson, Vigfús Jónbergsson og Ævarr Freyr Birgisson. Þjálfari er Natalia Ravva. Í æfingahópi U17 kvenna eru þær Arnrún Eik Guðmundsdóttir og Sóley Ásta Sigvaldadóttir. Þjálfari er Miglena Apostolova. Sömu drengir eru í æfingahópi U19 en þjálfari þeirra er Filip Sczewzyk sem er einnig þjálfari karlaliðs KA. Þær sem voru valdar til æfinga í U19 kvenna voru þær Alda Ólína Arnarsdóttir, Ásta Lilja Harðardóttir, Hafrún Hálfdánardóttir og Hólmfríður Ásbjarnardóttir. Það er hins vegar bara Ásta sem gefur kost á sér þar sem hinar eru fjarri góðu gamni. Þjálfari þeirra er Emil Gunnarsson. Við bíðum spennt eftir endanlegri liðsskipan en U19 liðin halda til Ikast í Danmörku 14. október og U17 liðin til Kettering á Englandi 31. október. 

Í dag mættust KA og Þróttur R. í 21. umferð 1. deildar karla. Leiknum lauk með sannfærandi 3-1 sigri okkar manna þar sem Ævar Ingi Jóhannesson, Atli Sveinn Þórarinsson og Hallgrímur Mar Steingrímsson skoruðu mörk KA. Eftir leikinn er KA í 6. sæti 32 stig þegar að það er ein umferð eftir.

Í dag fer fram forkeppni hjá 2. flokki karla þar sem keppt er um hvaða lið leika í 1. deild í vetur eða verða í 2. deild. Liðunum er skipt í fjóra riðla og eru Akureyri, Valur og ÍR í D-riðli sem leikinn verður hér á Akureyri á laugardaginn. Það verður því fjör í Íþróttahöllinni þar sem þetta þriggja liða mót verður drifið af í einum grænum.

Nú er komið á hreint að úrslitaleikur 4. flokks kvenna verður í Boganum kl 19:00 í kvöld. Flugfélagið hefur ekkert verið að fljúga í dag þannig að Valsmenn hafa ekki komist til Akureyrar. Þær eiga flug núna kl 16:45 sem gefur auga leið að ekki er hægt að spila kl 17:00. Leikurinn hefur því verið færður til kl 19:00 og verður að vera í Boganum þar sem birtuskilyrði eru ekki nægilega góð á Akureyrarvelli þegar líður á leikinn. Allir að fjölmenna í Bogann kl 19:00!

Það er orðin löng hefð fyrir því að hefja handboltavertíðina með kynningarfundi þar sem farið er yfir starfsemi félagsins og ekki síst að kynna leikmannahópinn fyrir stuðningsmönnum. Fimmtudaginn 12. september, klukkan 20:00 er komið að kynningunni og hvetjum við allt áhugafólk um handbolta til að koma í Íþróttahöllina og kynna sér starfsemi og leikmannahóp Akureyrar Handboltafélags í vetur.

Vegna þrengsla í sal og breytinga á stundatöflum þjálfara þurfti að færa til æfingu hjá K2 og P3.Hér er komin ný stundatafla með þeim breytingum.

Á fimmtudag verður stærsti leikur sumarsins á Akureyrarvelli. Þar mætast KA og Valur í úrslitaleik 4. flokks kvenna A-liða. KA hefur spilað 6 úrslitaleiki undanfarin 6 ár og hafa allir þessir leikir verið spilaðir fyrir sunnan fyrir utan einn sem var spilaður á Blönduósi en þá varð 3. flokkur karla Íslandsmeistari.