KA tapaði fyrir HK, 12-15 í oddahrinu.

KA tók á móti góðvinum sínum í HK í dag og voru það hinir spræku Kópavogspiltar sem höfðu sigur. Liðin spiluðu til úrslita í fyrra og þau buðu áhorfendum upp á hörkuleik.

HK vann fyrstu hrinuna 23-25 en KA tvær næstu 25-18 og 25-16. Virtust HK-strákarnir alveg loftlausir á þessum kafla og KA-sleggjurnar nutu þess að lemja á þeim. HK tók svo fjórðu hrinuna þar sem KA dinglaði ansi lengi í snörunni. Endaði hún 23-25 eftir að HK hafði komst í 19-23 og 20-24. Í oddinum var KA með forystu 6-3 en HK jafnaði í 6-6. KA komst svo í 7-6 en þá fór allt í steik. HK skoraði fimm stig í röð og lagði grunninn að sigrinum, komst þar í 7-11. KA klóraði í bakkann en þegar HK-ingar skoruðu sitt 13 stig fengu þeir bónusstig þar sem Marek missti sig á bekknum og uppskar hann að sjálfsögðu gult spjald. Staðan því 10-14. KA náði svo tveimur stigum áður en HK kláraði leikinn.

Allt annað var að sjá KA-liðið í þessum leik heldur en í síðasta heimaleik þar sem liðið lá 0-3 gegn Þrótti. Þjóðverjinn Till Wohlrab spilaði á miðjunni  en að auki voru Jóhann, Valur og Davíð Búi komnir á vaktina á ný. Þessi liðsauki dugði því miður ekki enda var liðið ekki að spila nógu vel. Aðeins Davíð Búi hélt haus allan leikinn og spilaði vel í vörn og sókn. Piotr var fínn í vörninni en gerði allt of mörg mistök í sókn. Aðrir tóku einn og einn góðan bolta en voru að spila undir getu. Greinilegt er að Marek á eftir að slípa liðið aðeins til en HK fékk allt of mörg stig vegna misskilnings og sambandsleysis milli manna.

Að lokum verður að minnast á ákveðin atriði sem áhorfendur hreinlega geta ekki sætt sig við. Sá ljóður sem hefur verið á leik liðsins síðustu ár virðist lifa góðu lífi. Leikmenn eru allt of fljótir að kólna niður í mótlæti og sumir fara bara í fýlu. Tvö gul spjöld í tveimur síðustu hrinunum reyndust dýrkeypt þegar upp var staðið. HK strákarnir fengu líka gult spjald en þeir héldu leikgleðinni og má því segja að sigur þeirra hafi verið sanngjarn.