Fréttir

KA/Þór tapaði með fjögurra marka mun gegn Haukum, 31:35, er liðin mættust í KA- heimilinu í dag í N1- deild kvenna í handbolta. Leikurinn var jafnframt síðasti heimaleikur KA/Þórs á tímabilinu. Markvörður Hauka, G. Bryndís Jónsdóttir, reyndist norðanstúlkum erfið í dag en hún varði 30 skot í leiknum og afrekaði að skora eitt mark. Martha Hermannsdóttir var besti maður KA/Þórs í leiknum en hún skoraði 9 mörk, þar af 2 úr vítum.

Í dag, laugardag klukkan 16:00 leikur kvennalið KA /Þórs lokaleik sinn á heimavelli í vetur gegn Haukum í KA heimilinu.  Stelpurnar hafa verið á uppleið eftir áramót og því getum við átt von á spennandi leik.

Vegna mikillar fjölgunar liða á mótinu um næstu helgi þurftu mótshaldarar að breyta niðurröðun. Það þýðir verulegar breytingar hjá KA drengjunum og munu þeir spila leikina sína fyrri part laugardags og ljúka leik um kl. 14.30. Því þarf að aka til Reykjavíkur á föstudag og er mæting í rútu kl. 16.00. Gist verður í KR heimilinu þar sem drengirnir fá einnig morgunverð. Þeir fá einnig tvær heitar máltíðir. Að öðru leyti er vísað í fyrri upplýsingar. Verð er óbreytt kr. 3.000. Vegna forfalla vantar foreldri í fararstjórn - áhugasamir eru beðnir að hafa samband við undirritaðann sem fyrst. Kveðja, Jóhannes G. Bjarnason s. 662-3200

Fyrsti leikur í úrslitakeppninni um Íslandsmeistaratitilinn fór fram í kvöld. KA vann þá Þrótt 3-0 eftir nokkuð jafnar hrinur. Engu líkara var sem leikmenn hefðu samið um að taka þrjár hrinur með svona hæfilegri áreynslu því leikurinn var frekar bragðdaufur í heildina. KA fer suður og spilar við Þrótt á föstudagskvöldið. Liðið sem fyrr vinnur tvo leiki kemst í úrslitaeinvígið. Stelpurnar spila sinn fyrsta leik gegn Þrótti á Neskaupstað nú á fimmtudag en fá svo Fylki í heimsókn næsta miðvikudag. Úrslitakeppnin hjá konunum er þannig að fjögur efstu liðin í deildinni spila tvöfalda umferð.

Aðalfundur K.A. verður haldinn þriðjudaginn 23. mars n.k. í KA - Heimilinu. Fundurinn hefst klukkan 20:00 og eru allir félagsmenn hvattir til þess að mæta.

Hinn 22 ára gamli örvfætti varnarmaður, Kristján Páll Hannesson, hefur gengið til liðs við KA úr röðum Magna á Grenivík.

Aðalstjórn KA og stjórn Blakdeildar KA bjóða til mótttöku í KA heimilinu á morgun mánudag til heiðurs nýkrýndum bikarmeisturum KA.  Athöfnin verður frá klukkan 17:30 til 18:00 og er öllum velunnurum KA boðið að mæta og heilsa upp á strákana og óska þeim til hamingju með langþráðan og glæsilegan sigur í dag.  Strax á eftir eða klukkan 18:00 bíður KA svo bæði karla- og kvennaliðinu til matarveislu í KA heimilnu. Vonumst til að sjá sem flesta koma og samgleðjast með strákunum.  Til hamingju strákar og til hamingju KA menn.  Stjórnir KA

Nokkrar myndir eru komnar frá bikarúrslitunum. Þær má sjá í myndasafni.  Hér má einnig lesa umfjöllum um leikina.

Í dag tryggði mfl. karla í blaki sér bikarmeistaratitil í blaki. Okkar menn öttu kappi við Stjörnuna og báru sigur úr bítum 3 - 2 í úrslitaleiknum sem fram fór í Laugardagshöllinni fyrr í dag. Við óskum strákunum til hamingju með árangurinn! Stelpurnar spiluðu einnig til úrslita í dag við HK, en töpuðu leiknum 3-1. Móttaka bikarmeisturunum til heiðurs verður haldin kl 17:30 á morgun mánudag í KA - Heimilinu. Vonumst til að sjá sem flesta!

Okkar menn gerðu jafntefli við íslandsmeistara FH í Lengjubikarnum í dag. Lokatölur voru 3 - 3 en Andri Fannar skoraði öll mörkin okkar. Þess má geta að við spiluðum manni færri í 70 mínútur en Dean Martin var rekinn útaf í upphafi leiks. Eftir jafnteflið situr KA í næst neðsta sæti síns riðils með aðeins 1 stig, en þetta var fyrsta stigið sem við fáum á þessu móti. Myndir frá leiknum er hægt að sjá hér. Myndirnar tók Sævar Geir Sigurjónsson.