Fréttir

Íslensku strákarnir í U-17 landsliðinu í knattspyrnu gerðu sér lítið fyrir í dag og tryggðu sér sæti í úrslitakeppni Evrópumóts landsliða. Þetta er frábær árangur og undirstrikar enn og aftur hversu öflugt þetta landslið er. Íslendingar sigruðu Litháa í dag með fjórum mörkum gegn engu á sama tíma og Danir lögðu Skota 3-2. Íslendingar og Danir hlutu jafn mörg stig, en Ísland fer áfram í úrsitakeppnina með einu marki betra markahlutfall en Danir. Stórsigurinn í dag gerði því gæfumuninn. Sem fyrr var KA-maðurinn Fannar Hafsteinsson í marki Íslands í dag og hinn fulltrúi KA í liðinu, Ævar Ingi Jóhannesson, kom inn á á 44. mínútu.  

KA varð að sætta sig við 2-1 tap gegn úrvalsdeildarliði Keflavíkur í Lengjubikarnum í Reykjaneshöllinni í gær. Jóhann Helgason skoraði mark KA í síðari hálfleik.

KA sækir Keflvíkinga heim í dag suður með sjó í Lengjubikarnum. Bæði lið sigla fremur lygnan sjó í þessum riðli.

Íslensku strákarnir í U-17 landsliðinu sigruðu heimamenn í Skotlandi í kvöld í öðrum leik sínum í milliriðli Evrópumóts landsliða með einu marki gegn engu. KA-strákarnir Fannar Hafsteinsson og Ævar Ingi Jóhannesson stóðu vaktina í leiknum, Fannar varði mark Íslands og Ævar Ingi kom inn á 56. mínútu leiksins. FH-ingurinn Kristján Flóki Finnbogason skoraði mark Íslands á 43. mínútu leiksins.

Stelpur úr m.fl Þór/KA kíktu í vikunni á æfingu hjá 5.fl. , 6.fl, og 7.fl kvenna. Þær eru nýbúnar að gefa út dagatal fyrir árið 2012 en þetta er árlegt hjá stelpunum.

Fannar Hafsteinsson varði mark Íslands gegn Dönum í fyrsta leik U-17 landsliðsins í milliriðli Evrópumótsins í Skotlandi í kvöld. Leiknum lyktaði með jafntefli, 2-2. Ævari Inga Jóhannessyni var skipt inn á á 71. mínútu.

Fannar Hafsteinsson, markmaður í 2. flokki og mfl. KA, hefur verið valinn í byrjunarlið Íslands sem mætir Dönum í milliriðli U-17 Evrópumótsins í knattspyrnu í kvöld. Spilað er í Skotlandi og hefst leikurinn kl. 19.30 að íslenskum tíma. Unnt verður að fylgjast með textalýsingu af leiknum á heimasíðu UEFA - http://www.uefa.com/

Lára Einarsdóttir úr KA var í byrjunarliðinu og spilaði allan leikinn með U-17 landsliðinu í vináttulandsleik í Egilshöll í gær. Okkar stelpur höfðu 2-1 sigur. Staðan í hálfleik var 1-0 fyrir Ísland og stelpurnar bættu við öðru marki áður en þær dönsku náðu að minnka muninn. Seinni vináttulandsleikur liðanna verður í Egilshöll kl. 18 á morgun, þriðjudag.

Það var mannskemmandi frost í Boganum þegar KA tók á móti Víkingi Reykjavík í Lengjubikarnum fyrr í dag. Leikurinn var engin svakaleg skemmtun og var þetta ekkert meira en fínasta helgarafþreying. 

KA mætir Víkingi Reykjavík í Lengjubikarnum laugardaginn 17. mars nk. kl. 15.00 í Boganum. Þetta er fjórði leikur KA-liðsins í þessu móti, en áður hefur KA tapað fyrir úrvalsdeildarliðum Skagamanna og Stjörnunnar en unnið 1. deildarlið ÍR.